A pouco máis dun mes de que dea comezo o II Encontro do Viño Galego Revera Vinum en Compostela, as entradas para asistir ao evento xa se puxeron á venda a través da páxina web. Así, quen desexe asistir á cita, que terá lugar os días 27 e 28 de marzo, no San Francisco Hotel Monumento, poderá comprar as súas entradas desde hoxe ao prezo de 10 euros o día, que lle dará acceso ás diferentes casetas de empresas distribuidoras e adegas, representando a todas as denominacións de orixe e indicacións xeográficas protexidas galegas, e que formarán parte dá área expositiva do Revera Vinum.
Ademais, coa entrada tamén se poderá acceder a algunha actividade gratuíta e ao Túnel do Viño onde os visitantes poderán coñecer máis de 300 referencias mentras gozan e aprenden co asesoramento do persoal que o atende, durante 30 minutos. Así mesmo, desde hoxe poderanse adquirir tamén as entradas para as actividades de pago, cuxos prezos van dos 35 aos 45 euros, e entre as que se atopan conferencias, catas guiadas e mesas redondas a cargo de prestixiosos relatores.
